西班牙自恃傳送王，冇鋒照闖決賽，中前場各人精神面貌同功能一樣，來到決賽，除非唔睇，焗捧一隊，坊間愛「意」球迷變多；總覺狂牛有餘未盡，迪保斯基深藏不露，上盤回飛可捧。

　　意西俱唔係賽前那杯茶，所以來到決賽，已無主觀感情，西班牙今屆只曾撐過一次，大炒愛爾蘭，路人皆中；上仗力捧葡萄牙，盤口中正佢哋卻戰至12碼輸波，運氣使然，無謂怨，唉！今屆睇親12碼，捧嗰隊必輸。西班牙今屆令人唔暢快嘅係，未發揮大眾對他們應有期望，但又殺入決賽；相反意軍朝氣勃勃，仗比仗勇，個性球星又特別，夠晒矚目。大莊竟然開盤後即日轉盤，西班牙縮回少讓平/半，聞所未聞；顯然唔少*友，根本懶理排陣、軍情，對又成冷門嘅意軍充滿憧憬，博冷望中番筆唞暑費。

　　估計意軍會沿用上仗漂亮贏德國陣容，西班牙無謂諗，因為真係估唔到，成場波都係一個表情嘅迪保斯基；但西班牙變招能力極多，其實連上屆捧歐國盃，呢個主力班底已合作4年，仲可以不停變招，算好巴閉。今場要對付派路，排4-6-0夠塞；要破保方，中路互搓突入禁區最好；要頂巴神，踢過英式足球嘅碧基要勝任。望西班牙今場顯露真本色，打和加時互射12碼，小弟認為意軍士氣會進一步提升，到時轉軚也未可料。

　　歐國盃將完，身邊不少足球狂熱分子開始高呼空虛寂寞；其實奧運足球約3個多禮拜後上演，曼城鬥車仔嘅英超社區盾喺8.12上演；*少一個月垃圾波又何妨，專心欣賞奧運更樂。本欄寫了3個多禮拜，貼士有中有輸，最重分享感受，也多謝捧場，緣未盡話，8.18英超見

　　今日心水
　　熱：西班牙勝
　　冷：西班牙勝2:1、3:1