葡萄牙今晚要面對隻玩乜陣都贏嘅狂牛，劇本係自己編嘅話，希望佢哋看到英法「慘敗」後，咪自亂陣腳，仍能保持近幾場一樣嘅作戰心態；南歐同路波，捧讓球下盤，再冷敲葡W。

　　好多人賽後話「英軍好屎，唔夠揪」；其實開波前大家都話佢哋係冇牙獅子，能以4戰不敗出局算交到貨。波友可回看歐聯盟主車仔，用同一種態度笑到最後，守得好之餘，更有強勁運氣護體而已。不過意軍肯攻，係值贏兼抵讚嘅！

　　變嚟變去，盞玩死自己，葡軍係4強中陣容變動最少嘅一隊，唔係上仗普斯迪加傷出，去到第5戰，教練保羅賓度準會續沿用正選11人。同事牽牛兄話希望佢哋出中鋒曉高艾美達擔正，試考驗狂牛守高空波較弱呢瓣搵着數；小弟贊同之餘，其實呢支擺明係一人球隊，其他人做到嘢都係希望掩護Ｃ朗，畀佢威威。我更希望其他兩位英超兵爭口氣，拿尼成個賽事暫時如夢遊球場、中場工兵魯爾梅利斯心理質素係好；但同其他中場隊友一樣，今場專注掃蕩，咪浪射好了。

　　狂牛上仗贏法國，路人皆讚，未見真章，少唞兩天唔係問題；不過今場對手中場截擊務必更強，又要防王牌射手C朗，要easywin唔會再咁容易，仲有讓半/一盤食成個咁筍？推敲大賽，堅持搵啲一仗比一仗好嘅球隊，追到斷為止；葡軍一直屬此射程範圍，只希望佢哋唔好突然走樣，畀狂牛迫到龜縮，連續睇3場悶波好了。

　　今日心水
　　熱：葡萄牙（下）
　　冷：葡萄牙勝