法國受挫瑞典轉鬥1哥狂牛，唔少人轉軚棄法國係正常。8強賽中，堅信呢場已係最有爆冷條件，亦望「雄雞」戰將攞番啲紀律出嚟，咪畀隻牛搓得咁舒服。

　　踢大賽，紀律真係好重要，荷蘭頹勢，去到尾輪鬥葡，星級戰將依然故我，仲玩自暴自棄，終於3連敗出局。法國陣營一向自負，兩年前世界盃時災難性內訌玩罷操，結果分組賽包尾出局；換帥洗牌再來，前景公眾看好，結果負瑞典焗轉鬥狂牛，又據報陣容現嘈吵聲音，輸波有怨氣，好在今次搞事者算係啲二打六，希望教練白蘭斯鎮得住。

　　曾經替法國（06年）及今屆車仔，分別砌低過西班牙同巴塞嘅法國老翼鋒馬隆達，道出要打低呢隻近年成世界足球戰術典範嘅狂牛，關鍵在於咪畀佢中場任搓；雖然法國中場工兵級數一般，但工兵從來都係只需要做好掃蕩工作，咪「上頭」走去助攻便是。

　　Ｃ朗一人之力打低捷克，其實其他球員幫佢做咗唔少dirtywork。皇馬前屆西班牙盃殺低巴塞，關鍵在於摩帥下令戰將要不惜氣力，用全場緊迫踢法再加點辣，對方根本搓唔到幾腳，交唔到畀美斯。

　　仲未入過波，賓施馬今場其實最重要任務，係引出皇馬隊友、西班牙中堅沙治奧拉莫斯，由列貝利同拿斯尼快速突入狂牛防線施襲，先係王道攻略；主力戰將能放低尊嚴，全力執行球隊指示，團隊先有希望。

　　大名鼎鼎如C朗同昨晨為熱火封王NBA嘅勒邦占士也得，英軍都識萬眾一心，法國一班少爺兵，得唔得？

　　今日心水
　　熱：法國（下）
　　冷：法國晉級