3戰全勝拿下死亡之組，德國慢條斯理，未見真章；來到8強，又有幸遇着希臘，奪標大熱鬥大冷，對住債仔，望德國唔留手，為波友儲到*本迎接歐國盃瘋狂周末。

　　希臘國人投票，肯低低地躀一鋪，聽一眾包括德國嘅歐洲有錢佬講，選擇留喺歐元區，勒緊褲頭；政局暫穩，世界股市暫時拆彈，但今場冇咗中場發電機兼精神領袖加拉高尼斯，希臘足球隊真係冇覺好瞓。

　　8年前另一隊長薩高拿基斯係國家神奇捧盃嘅大功臣，但今場佢哋一定想學上次偷俄軍雞咁，全部突擊將球傳到中鋒森馬拉斯腳下，再由後者喺中圈附近回傳隊友走位打快速突擊；我諗今次接應者，相信冇一個有加拉高斯尼斯嘅能耐；亦唔信森馬拉斯背靠背，可以喺德國鐵衞招呼下，停到個波策動反攻。

　　今場賠率一面倒，連喺擂台前列兼屢中第一隊入球嘅德國躉嘅青蛙仔，都話唔吼呢瓣彩池，小弟當然會將部份注碼攻希臘零入球波膽。德國有餘未盡，幾場波贏來有驚無險，對葡丹未領先前，對方都有球員中柱或中楣；鬥荷蘭，尹佩斯醒啲可以喺開波早段入兩粒。只希望德國今場打醒精神，唔好學俄羅斯咁，自亂陣腳；兩軍質素實在差太遠，上半場入唔到波都咪急，希臘班老兵頂唔到全場?，德國勝2:0、3:0仍有望開到。

　　嚟緊兩場半準決賽戲碼極強，不過都希望今晚場攻防戰，唔好悶到揸機大佬將鏡頭頻頻影住德國教頭路維有冇食鼻屎，咁嘔心好喎！

　　今日心水
　　熱：德國（上）
　　冷：德國勝2:0、3:0