話咁快第3輪開打，公平起見，兩點9同時間雙料娛樂；A組戲碼弱啲，但今輪似好*多過好睇格局。主隊波蘭小弟當捧，但細看「半俄全俄」更值押注。俄羅斯呢隊東歐奇兵，勝在部份段速勁，食正要焗贏嘅希臘老兵；未到淘汰賽，佢哋唔似會停步，半勝2.3倍，最合出擊。

　　由今晚起至決賽，所有賽事同步全夜場開打，今屆實力平均，混戰格局；遇有戲碼好嘅，隨時出現球迷喺老尖或老蘭睇歐聯決賽車仔對拜仁咁，踢到互射12碼見太陽，但成街都仲係球迷，等「打的」返歸嘅慘況。對我哋呢類返夜班嘅貓頭鷹，深夜開波當然更好；返到屋企食個消夜，開住iPad「現在隨時睇」，同家中嘅桌上電腦玩走地，三面戰線也可應付。足球大賽兩年一度，變「熊貓」，食吓消夜放肆吓都唔算太過份啩。

　　今天重心，同前文撐克羅地亞、但重心兼捧狂牛[-1]得手策略一樣。我信波蘭一仗比一仗好，可望贏波出線；但另一邊廂，俄羅斯以國內大球會為骨幹，優勢係歇冬後開季只三數月體力正盛，一眾當打小伙子默契好之餘，望借歐國盃舞台去西南歐大球會掘金，踢得幾博命，何況贏波有力首名出線避開德國。本欄也彈過艾沙維莫氣，但踢到幾十分鐘好波足夠領軍殺退一班希臘老人家；俄兵已連續兩場開半勝，今場一樣得，下半場收夠籌主力hea打保勝果一啲唔奇！

　　今日心水
　　熱：波蘭（上）
　　冷：俄羅斯[半勝]