世界變得快變得亂，人便膽小易滿足求安穩，iBond執幾厘息也全城熱抽；今晚兩大歐洲宿敵荷德去到第二輪對決，荷蘭焗住冒險主攻，防線會進一步暴露缺口，捧入球「大」應穩，小弟貪啲吼埋冷橙W止渴。

　　德荷場上鬥足近40年，癡情如英超 曼聯鬥阿仙奴，宿敵意味尤勝英法；碰巧新敗被球迷怒插嘅荷蘭繫出線存亡，我諗呢場波點都會激過英法半hea打下和局收場。唔想多諗德國人喺咪精於計算；或者沉醉兩年前世界盃亞軍嘅荷蘭，鋒將們繼續自暴自棄，浪射到尾輪提早放暑假呢類負面因素。球迷肯捱夜，或者三五知己約埋睇大戰，也會想個誘因藉口，催眠自己出動；當然，畀英法戰呃咗出去pub睇波，兼「讓球」臨場上盤起票，和局變輸咗半格嘅波友，咪當感受吓歐國盃市面氣氛咯。

　　主打呢場波嘅牽牛兄，臨場通知編輯貼荷蘭2:1變為見報大家見到嘅2:2，重心入球「大」則不變。小弟則堅持少*「讓球」盤，故唔揀受讓嘅下盤推介，寧減注攻單W，望一鋪收復對丹麥之失。踢波逐場計，我認為荷蘭要贏，尹馬維克一定要變陣；防線出番馬菲臣，前線用德甲神射手亨特拉爾作牽制，方能釋放尹佩斯嘅威力；至於洛賓，佢唔係儍仔，唔信佢喺幾億觀眾面前，繼續亂射，讓自己孭晒成隻鑊，信焉？

　　今日心水
　　熱：荷蘭大
　　冷：荷蘭W