英格蘭打番起，學鶴臣話齋，個個都好似變番英格蘭球迷，貼波冇得拗氣，但可隨時轉軚；呢場唔係曼城內訌戰，係戰術嘅對決，英軍咪淨係掛住腦殘巴洛迪利，呢場鬥意大利坐和望贏，去到踢12碼，睇彩數啦。

　　葡萄牙有Ｃ朗打一人球隊、德國教練團藝高膽大，突變陣大炒希臘，籌碼多肯冒險變陣，輸兩球又如何；路維年少有為，下場自有唔同部署。今晚來到8強最終回，老帥鶴臣屬穩陣派，英格蘭板斧不多但實用，碰巧遇着戰術大師意大利。賽前估呢場波會係4場中最悶，不過相信本地球迷唔會介意聽朝要返工，去到踢12碼睇天光。英意戰踢淘汰賽真係好難得！

　　對法國大部份時間落下風，沉着應戰求和得和、對瑞典俾對手一度反勝都冇有怕，到運氣凝聚到鬥烏克蘭，有個幫英軍嘅發雞盲底線球證，贏足3場盤。今天傳媒集中講巴洛迪利，點同曼城防線重將尼史葛同赫特對決，新聞易做，但一向躁進嘅佢，大賽唔係關鍵棋子；英軍務必盯緊對手另兩人，一為意大利中場發電機，唔係派路，係佢隊友馬治斯奧，此子有跑不完氣力；當然兩軍屬保守派，今屆少入嘅罰球，睇吓係派路冧莊，定係謝四入到今屆第2個出現嘅罰球。

　　就算今場去到英國足球嘅大魔咒──互射12碼，希望佢哋車仔上身，一如歐聯決賽，連拜仁都掃低。好波不如好運，天佑英格蘭！